Oté

« Dann tan lontan, l’avé plis l’avnir ké koméla »

In kozman pou la rout

Justin / 31 désanm 2018

JPEG - 43.6 ko

Dann pasé, l’avé plis fitir ké zordi ! Ala in kozman moin la lir yèr matin é mi pé dir azot, moin la pass in mové zourné. Pou kosa d’apré zot ? Si ni konpran l’avnir konm sète inn pèrsone l’avnir sé d’aprann in métyé é sirtou gingn travaye dodan, sé gingn son pourkoi, fonn inn famiy, épi mène son pti vi trankilos. Lé vré kékshoz konmsa lé fine rar zordi é domin lé riskab ète ankor pli rar konm korn lapin… Astèr, si ni konpran l’avnir konm sète l’imanité ni pé pa z’ète kèr klèr pou in kékshoz konmsa. Avèk tout déga l’apré fé dsi l’anvironeman, tout kataklis natirèl lé anonsé, ni pé dir l’avnir l’imanité lé dann danzé. Mé zot va dir amoin, i rèss amoin dé zour pou pass dsi la tèr é ala ké moin l’apré inkyète amoin pou kékshoz i konsèrn pi amoin pou vréman. Poitan, mèm si mi koné mi sava pa rèss la pou lo grin, i inkyète amoin kant mèm ! Zot non ? Poitan la solidarité imène la pa in sasé vid sa ! Alé ! Mi kite azot rofléshi la dsi é ni artrouv pli d’van. Sipétadyé !