Mé zami zot la tandi sak l’ariv konsèye réjyonal avèk son bidzé ? Sirman pars sa sé in n’afèr i ariv pa toulé zour. Alala Didier Robert té oblizé diminyé son bidzé é kan i di diminyé dizon sabré pars kan in bidzé i dimin yé plis dé san si nkant milyon l’éro i pé pa di sé in sinp diminisyon.
Kan mi di sabré, mi pans Hara-kiri. Zot i koné fitintan dann péi zapon si out lonèr lété ataké dann in konba, dann in sirkonstans la vi, lonèr téi obliz aou fé Hara-Kiri.. ; zot i koné kosa i lé sa ? Ou i pran insab épi ou i tyé aou avèk. Kosa zot i pans mi konsètye lo prézidan ? Mi konsèye ali fé Hara-Kiri, Non va. Sak téi fé sa l’avé lo sans l’onèr, lo sans di dovoir, lo sans l’intéré zénéral. Dizon pa Hara-kiri, mé in sinp démisyon. Sa osi i gingn paf é ? L’onèr lé pi sak li lété !

Astèr bien malin sak i pé dir amoin li la kon pri pou kosa bidzé-la la rétrési konmsa. Inn i di sé la fote gouvèrnman. L’ot i di sé poar raport la rout an mèr. Inn i di sa ! L’ot i di la ! Mé o fon kisa la fine konprann kèl kon sékans in n’afèr konmsa i sava avoir ? Nou sitoiyn ni koné pa, pars la poin pèrsone, par l’fète la ésplik anou sa.
Bann dé gran zoinal la pa ésplik anou sa ? Zot noré pi avèk tousa larzan konsèye réjyonal la déblok pou zot : kazima plis in milyon pou inn, kazziman plis in milyon pou l’ot. Sa i dovré rann azot intélizan, ansa done azot lo moiyin pou moiyéné mé mi pans va zis nyabou rann azot sèrvil é pa plis. Dizon zot va sèrv boye pou Didier. Zot osi l’onèr i fé azot in pé défo-an touléka sé sak mi pans kan mi kalkil sa zordi.
Alé ! La pa bézoin parl l’onèr, la pa bézoin parl harakiri, la pa bézoin parl linformasyon onète pars tousala lé mor. Mi pans nou té fine konprann sa dopi in bon koup de tan.