Mi sort di kozman la, mé a pène mi sort di sa, ala ké moin lé a d’mandé si moin nana rézon san pour san. Lé vré, kan ou i fé kékshoz normalman ou nana in manyèr pou fé é si ou i fé pa konm lo mod’anploi i di, ou lé riskab pa ariv o bout. Alé mont in mèb ikéa san réspèk l’ord dé shoz, moin lé sir ou va trouv pyès an plis, vis an plis, goujon ousa k’na poin.I paré sé l’ordinatèr i di koman i fé. Donk obéi la mashine ! Ziska la na poin d’problèm mé mi souvien dann tan lontan moin té apré zoué la pongn avèk lo matématik é in zour moin la bit dsi in métod : sipozon lo problèm rézoli. Pa pou pi anparlé, mé pou trouv son solisyon. Donk, sa i vé dir, komans par la finisyon pou ariv lo komansman. Mi lèss azot réfléshi la dsi é ni artrouv pli d’van sipétadyé.