Matant Zélida la ékrir Justin :
Mon shèr nové, mon spès salté,
Alor éstèr, zot, bann rouj-de-fon, i vé fé rolèv lo mor. Zot i vé arfé tram-trin. Arèt èk sa ! Zot i oi pa lo moun lé fine fatigué antann parl de sa épi sa i fé pa zamé ? Fransh vérité, demoun lé pi la èk sa. Rouv in pé zot zyé, foutor mizèr. Zot i oi pa Kréol i èm son loto solman ? Sa mèm son méyèr kamarad ! Sa mèm son vi ! Sa mèm son shéri avèk in "e" sansa san "e". Kroi moin bien ! Kan tram-trin va roulé isi dan La Rényon, kok i tard ar pa an avoir lo dan. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Si ou té i égzis pa, nora falu invant aou. Ou i konpran pa, tram-trin la, sa i bar pa la rout lo kar, sa i anpèsh pa ou ansèrv out loto, kisoi out vélo, kisoi ankor out patin roulèt. Oplis nana moiyin transpor, oplis lé bon ; shakinn i shoizi sak lé bon pou li. Mé, fransh vérité, matant, kan ou lé dann trin, na poin l’anboutéyaz, na poin arien pou arèt aou. Ou i koné l’èr ou i sava, ou i koné l’èr ou va arivé. Kan solèy i poik, ou lé dan la fréshèr, ou lé dan bon èr. Sa lé pa valab sa ? Bouz aou éstèr. Pran sa pou ou !

 Justin