Oté

« Dann vyé marmite, i fé bon kari »

In kozman pou la rout

Justin / 12 novanm 2019

JPEG - 43.6 ko

Mésyé, Médam, la Sosyété, koz èk moin sé koz èk in kouyon-sé o pyé d’lo mir k’i oi lo mason. Zot i koné kozman an-o la, sa in kozman moin la antann néna lontan é mi kontinyé antann ali zordi. Mi di pa sa pars moin la fine in pé azé mé mi di sa pars moin la fine fé la romark. Pran in marmite nèv, prépar out kari é i étoneré pa moin ké li néna log ou ou i atann trouvé. An kontrèr si ou lé fine ansèrv out marmité ké out marmite la fine pran in sèrtin koulèr épi in sèrtin kalité d’gra, mi pans ou va konète kan out zognon sar zis a poin, parèye pou out tomate épi out vyann sansa out poisson rousi. Moin lé mèm sir kan lodèr va komans lové, l’èrla ou va gingn zizé si out kari lé déza bon. Astèr, dann in provèrb konmsa, i anparl pa solman kari, i parl galman d’ot shoz é an parmi ni pé dir léspèryans sé kékshoz k’i kont : par ébzanp, léspèryans i pé pèrmète in moun bien konète in téknik, bien konpran n lo tiktak in mashine, é oplis ou i fé léspèryans, oplis ou va konète bien fé lé shoz. Alé ! Mi kite azot rofléshi la dsi é ni artrouv pli d(van. Sipétadyé !