Sé lo bon sans i fé dir anou in n’afèr konmsa : si ou i mète zèf poul a kouvé, lé sir-si i éklo !-ou va gingn pti poulé. Si ou i mète zèf poul a kouvé épi i sort ti kanar, é bin, la na in problèm… dizon in problèm kont natir. Sa sé dann sans prop, mé dann sans figiré kosa sa i vé dir ?

Pou moin, sa i vé dir, i fo pa alé kont la natir. I fo pa alé kont la lojik. I fopa alé kont l’onèkté. In zistoir d’zéléksyon : mésyé zozèf lé prézidan lo biro, in moun i ariv é li di lo prézidan : « Mésyé zozef, la i mète zèf poul, asoir i sort ti kanar la ? ». Sa té dann tan la frod dann zéléksyon té i pèrmète tout z’afèr, mèm bour l’irn é konm bann z’ansien té i di : fé akoush lo momon koshon !… Sa sé sak demoun normal i pans mé zordi la fine pran l’abitid fé tout kalité léspèryans épi san atann pi loin i mète sa dann lo piblik.

Alor, si tazantan na in katastrof konm médikaman i rann demoun malad, konm kalité manzé i fatig lo kor ébin i fo pa ète étoné. Tout z’afèr lé bon pou fé larzan, mé lé pa bon souvan dé foi pou l’imanité. Na artrouvé !