Mi sort antannn méssié Magamootoo, Prézidan la shanm komèrs, déssi in radio : li lété apré rakont in pé sak li la viv la zourné lindi épi koman li la vi bann demoun téi rant dann ron gran diskision la fé zour-la... Momandoné, in moun la poz ali in késtion déssi le pri lésans. La dmann ali si li nana bon z’informaion la-dsi épi si tout lé klèr, pou li.
Li la fé pou répons, tout lé pa klèr a san-pour-san pou li. Li la di, li koné arienk katrovin pour san la vérité, pa plis ké sa !
Tan k’a méssié Jégo, minist gouvèrnman La Frans, li la di pou son par, k’li la domann in linspéksion pou an avoir in bon ransègnman, konm k’i fo déssi la késtionn lésans, gazoil, lo gaz... Somènn-si linspéktèr i doi vnir La Rénion...
Bin, bann journalis alor ? Bann kador i fé linformasion, kossa zot i koné ? Pétèt sak bann gran vaza i vé bien dir azot, sinkant pour san, soisant, sansa moins. Mé la vérité, la pa zot traka, provik k’i gingn atak la Réjion, ramas in mantèr, konm di La Fontaine, donn lo kou d’pié bourik. I kout pa shèr épi, i défoul bien, i risk pa granshoz...
Pandan s’tan-la ? Sak i ranpli son pla, i ranpli son pla ! Sak i ranpli pa, i ranpli pa ! Sé la vi k’i vé sa. Pa vré ? In pé i dans déssi volkan é i an apèrsoi pa... ziskakansa ?

Justin