Na dé-troi zour, dann mon vyé kok loto, moin té apré ékout radyo Frans-Inter. Zour-la, si mi tronp pa, lété lo zour té i fète l’anivèrsèr la mortalité Georges Brassens. Konm zot i koné, sa in gran shantèr, in bon parolèr... malérèzman, li la fine sote la vi. Domaz, mé la vi lé konm sa... zordi ou lé la, domin ou lé parti. Donkalor, moin té apré akout in l’émisyon radyo-la. In l’èr, in prézantèr i di bann z’artis i shant Brassens dann katrovin lang, épi pou légzanp, i pass in shanté an zaponé... in madam, in zoli voi, baba ! Épizapré, i pass in shanté lo maloyèr Danyèl Waro. L’èr-la, moin la ral zorèy. Zot i konpran, in l’artis rényoné dann radyo-la, sa i fo pa manké.

Figuir azot, lété lo shanté "La mauvaise réputation" an kréol rényoné. M’a dir azot, moin la trouv lété bien gouté. Par raport té in shanté Brassens lo boug la mète an kréol rényoné ? Par raport lo shanté lété zoli par li-mèm, pou li-mèm, mèm si té i koné pa sa in shanté adapté ? Mi gingnré pa dir azot, mé moin pèrsonèl, moin la bien aprésyé. Ala k’in l’ot prézantèr i di, Danyèl Waro-la, sa in l’anrajé. Mi koné pa bien kosa li té vé dir : in l’anrazé d’Brassens ? In l’anrazé pou nout kréolité ? In pé toute mi pans.

Moin la poin la plas pou parl an gran déssi Danyèl Waro. Fransh vérité, moin la pa d’mann ali lo droi pou fé sa. Mi pans, in zour, in moun pli kalifyé ké moin va fé, é touléka, sa va mérite ali, pars san pass la pomad, ala in boug la fé dé shoz pou kréol La Rényon ; Moin lé près sir, nana in bon pé d’moun i ador ali, konm i doi an avoir in bonpé i modi ali. Pars mèm si ou i anvaz pa dmoun, zot i koné demoun i vien anvaz aou. Alor, kan li shant, konm dan lo shanté « poitan moin sé in moun i anvaz pa pèrsone », si li pèrmète amoin, mi kroi mi sava mète in poin l’intériogasyon déssi la finisyon.

Justin