Dann défilé zédi 5 mars Sind-ni, na in bon pé d’tan lo group moin lé anparmi la fine arivé, é demoun i kontinyé goumant lo ta. Oté ! Nana demoun dann shomin !

In pti madam, in Rényonèz konm nana in bonpé, in mélanzé, in kafrine klèr, mé pa solman, i pas avèk in o, k’i rolèv aèl byin ; pti-fraz la ékri dann do : « Mi kont dési moin pou lésansyèl ! ».
Sa in kozman pou fé kalkilé, sirtou dann paraz la zourné la fam.

Dann in konbi, la mizik régé i donn lo grin é moin na l’inprésyon par son dé-anshé, lo pti madam l’apré dansé. La mizik i ral aèl, sa lé sir ; i fo dir lé valab. Mé lo bann parol lé moins, vik kom di lo kont, lé séksis… I antan zafèr konm : « Fam mèt la guèr, fam lang vipèr, kan ton mari rant fatigé, toué la pou fé la-di, la-fé ».

I fé l’èr k’sa i zènn pa pèrsone, poitan i dovré !

Moin la pa in moun pou kroir in n’afèr lé tout-an-roz, sansa tout-an-noir. Pou moin, inn é l’ot i mélanz. Nou lé pa aryink bon kom bon-bon, ou byin amèr kom lo fyèl, mé mi kroi dann l’imanité — é mi pans sirtou bann fam — la pankor trouv zot shomin galizé.
Mé tardra-vyindra. Zour-la v’arivé pou zot èt pa plis, pa moins k’égal épi diféran avèk bann bononm. Daoir sa mèm zot karma !

Justin