Sa téi éspass pou in zélékssion kantonal dann bann zané sinkante é la fédérassion kominiss dann tan-la lété for é Henri Lapierre avèk Isnelle Amelin lété bien parti pou gingn lo zélékssiion é zot la gagné, si mi an souvien bien… Donk dann milyé son kozman lo proféssèr La pierre la shante in boute romanss dsi in èr d’mardi gra é téi di konmsa :

Kominiss la di, kominiss la fé, kominiss la komandé,

Sote koman ti vé koko toué lé pri dan la min korbo.

Plizyèr santène pèrssone té la, la pète a rir mé pou kossa mi panss Darmanin ? Pars li la promète bann monopol li sava sévir, pars la vi lé tro shèr dann bann péi l’outre-mèr. Lété tan ké li apèrssoi, mé tanka sévir, konte touzour, fyé pa tro !

La pa bann monopol bann fossoiyèr la départmantalizassion. La pa zot la fote si zordi ankor la vi lé shèr. La pa zot la fote si lo péi lé pa dévlopé konm k’i fo mé bann pouvoir piblik dann toussala zot lé konpliss kissoi la droite, kissoi la gosh, kissoi lo ni droite ni gosh.

Alor son protèstassion dopi lo Passifik, mwin pèrsonèl, mi pran sa pou la valèr é an kontrèr i étoneré pa mwin k’olèrk afébli bann monopol va ranfors azot. Lo réjime Macron lé konmsa : kan li promète in n’afèr, li fé lo kontrèr — kroiyé moi é fouté vou d’dan é si anpliss li trouv pa la rézistanss k’i fo dann bann téritoir l’outremèr, li rante ladan konm kouto brilan dann karé do bèr.

Alor la pa domin la vèye, si ni baz dsi gouvèrnman, nou va oir bann pri béssé. Tou ziss si i propoz pa nou in panyé la ménazère. Zot i koné bann produi i mète anba, atèr dann réyon, é la plipar d’tan wi oi mèm pa-toute fasson mwin la fine dir sak mi panss bann produi-la pou noute santé. Noir zordi la pa blan domin… La konsomassion okssidantal la pankor fini fé d’tor noute santé.

A bon antandèr salu !

Justin