Mi pans zot tout i koné lo konba rant David épi Goliath. Sa la spass dann tan lontan. Bann Filistin l’avé atak in péi lo roi téi apèl Saül. Dann l’armé bann filistin l’avé in zéan téi apèl Goliath, in moun plis dé mète grandèr. Tout bann solda Saül l’avé pèr ali. In zour, pou fini la guèr bann filistin la domann son bann z’ènmi shoizi in boug pou lite inn kont inn aprésa la guèr sar fini, bann vinkèr va pran tout lo bien bann vinki épi bann vinki va vni zésklav.

David lété gardien mouton é lo pli pti anparmi son sète frèr. Li té mèm pa solda, mé kan li la aprann sa li la fé dir lo roi Saül li lé bon pou konbate kont Goliath. Lo roi la di non mé kant David la di li la fine tyé in lion avèk in l’ours té apré atak son bann mouton. Saül la done son l’akor.

Bann filistin téi i ri a fé mal z’ot vant. Goliath la pans sa lété in plézantri, bann l’armé Saül téi tranm avèk la pèr. Inn tou sèl téi tranm pa lété David lo jenn gardien mouton. Kan Goliath la avansé, David la marsh dési ; li la tir in rosh blé dann son sak épi li la arm son lans-galé-in frond i apèl sa.. In kou, in sèl, galé la parti tout vitèss, la bate an plin dann koko Goliath, la pèrs son tète é li la tonm rède mor. Ala, an gro l’istoir David kont Goliath.

Kalité la lite konmsa ni koné in bonpé : Vietnam kont l’Amérik, Kuba kont l’Amérik épi d’ot ankor é ofiramézir bann guèr konmsa va arivé é in bann David va lévé é nora l’okazyon pou bate bann Goliath… Zistoir-la, mi rakont sa mon bann zamiy bannzil Chagos. Mi koné z’ot konba lé dir vi k’zot néna kont zot gouvèrnman bann z’anglé épi gouvèrnman bann z’amérik épi tout in bann zésploitèr. Mé afors la pasyans, afors l’intélizans, afors la ténasité, mi koné zot va gagn lo konba an finnkont.

Néna arienk bann konba ou i amenn pa ké ou lé sir pou pèrd ali. Sak ou i amenn, si out koz lé just ou i fini par gagné. David kont goliath ? Sé David la fini par gagné. Li la bate lo gran zéan Goliath é bann filistin an mèm tan. Obliy pa sa !