Oté

Dé épi troi aout : in l’anons bann ladomin i shant ?!

Justin / 7 out 2018

JPEG - 43.6 ko

Mi sort lir dann zournal sak la spasé somenn pasé dann Tana, la kapital nout gran voizin Madégaskar. In santène pèrsone la réini pou diskite in pé dsi l’avnir bann péi l’oséan indien. Dé l’asosyasion la mète z’ot fors ansanm pou diskite dsi la diplomasi bann pèp.
A ! Mi antan déza, in bann rabazoi apré di sa sé in n’afèr lé pa konsékan ditou. Poitan l’avnir, mi dout pa, va amontr anou sa sé in n’afèr konsékan.

- Dabor, pars forum-la la pran konm baz lo droi pou bann shagossien rotourn viv an pé dann z’ot bannzil natal é Olivier Bancoult lété laba pou déklar avèk fors lo droi bann shagosien pou rotourn shé zot.

- Dézyèm z’afèr, forum-la la réini bien désidé pou fèr an sort i rofé pi bann pèp l’ouès loséan indien lo mové kou d’la COI : transform in bon afèr an mashin i sèrv pa ditou sak li pé sèrvir an bien pou bann pèp nout koté l’oséan indien.

- Troizyèmman, forum-la la éspas dan la kapital in péi i dovré z’ète in puisans moiyène dann l’oséan indien gran konm La Frans+La Belgique, péplé par la avèk plis karant milyonn moun dann pa tro lontan…

- San obliye lo poinnvizé d’lo ko-dévlopman ép i lo dévlopman dirab. San obliy galman lo forum lé fé pou réini ali in foi par an avèk bann promès progré ni pé atann pou oir arivé dann lo fitir nout bann pèp.

In l’éspoir ? Fèr tèl fason, dann l’avnir tout bann pèp l’indyanoséanité i group pou komansé dann lo forum, é firamézir i gingn mète anlèr l’indyanoséanité konm in groupman pou la pé, pou la soli-darité é akoz pa pou anons bann landomin i shant.

NB Kisa noré di kan bann kréol la réini dann Sésèl, sa noré déboush in zour dsi in zourné internasyonal bann lang kréol, épi in somenn kréol avèk in ta épi in paké manifèstasyon i amontr nout bann lang kréo lé bien vivan. Akoz pa in mèm déstiné pou nout forum l’oséan indien ?