Médame zé Mésyé, la Sosyété, koze èk mwin sé koze èk in kouyon, mé sé o pyé d’lo mir k’i oi lo vré masson.

Mézami, mi di azot zordi in kékshoz lé pa plézab mé i fé riyin pars sa i rapèl amwin mon zénèss. Figuir azot mwin l’avé in gran père té fine trape Matizalèm an laz si tèlman kan li téi sava kékpar sirtou in lantèrman, demoun té i rogarde ali an dsou épi téi di : « A ! Méssyé intèl ! Ou lé ankor la don ? ». Mon granpèr téi konpran lé shoze rante lé lign sak banna téi vé dir ali é konm li té in pé siséptib konm fèye zanzitiv, momandoné li la prépar son réponss é son réponss sé sak mi marke pou zot zordi. Mé antansyon mwin lé pa siséptib mwin, si mi di sa, sé pou anparlé pou pa lèss la lang o shomaj.

Alé ! mi kite azot rofléshi la dsi é ni artrouv pli d’van. Sipétadyé !