Lé ga, mi sort lir in n’afèr la rotourn amoin pou d’vré. Kosa i lé d’apré zot ? Moin la lir dann in zournal, Moris la-ba, désèrtin moun instruiyé l’apré kalkil si i fo pa fé in santral nikléèr shé zot pou an avoir l’énèrji an kantité. Konm di lo kont : "In kouyon lé danzéré !", mé mank de shans, lo moun i mazine sa i diré sa la pa in kouyon… li lé instruiyé. Li apèl Gaj Pyndiah, in l’inzényèr, é li déklar dann zournal “Le Défi”, l’instalasyon in pti santral nikléèr bien kalkilé pou la konsomasyon l’il Moris i pé èt in bon solisyon.

Moin lé a d’mandé ousa li sava rod in n’afèr konm sa pars, fransh vérité, la pa l’énèrji i doi mank in péi konm Moris pars lo péi lé konm la not : laba na kann, na l’oséan, laba la biomas i mank pa, solèy i donn paké. Olèrk alé travay dsi sak lo péi nana, li l’apré divagé pou majine in santral nikléèr... I fo dir, isi osi na inn-dé la tèt félé la fine majine fé in n’afèr konm sa dann Por. Lé vré, l’EDF la fine kalkil rosikl lo bann soumarin nikléèr i va pi ni d’van ni déyèr an santral pou bann péi l’Outre-mèr. Kan moin la di sa in dalon, lo boug la réponn amoin : "I mank anou arienk sa mèm !".

Siouplé, alon arèt déliré. In pé i vé fé pas in pon dan la mèr ! In pé i vé konstrui bann santral nikléèr ! In pé i vé transform la montagn an pist pou lo ski ! An Amérik, banna i vé klimatiz la tèr ! In ptit doz la rézon i pé sèrv a kékshoz kant mèm. La pa bézoin alé rod midi a katorz. La pa bézoin alé rod sak nou na poin é obli sak nou nana. Moin lé a d’mandé si koméla in pé na poin kankrola dan zot plafon.

Mi souvien in kamarad l’ékol té i di amoin, kan li té i vé gaspiy demoun, i ariv ké l’intélizans i kost-kost sanm la kouyonis. Sanm pou moin, i kost-kost pa soman, inn i rant dan l’ot épi invèrsman... konm in zanr l’osmoz !

Justin