Médame, zé méssyé, la sossyété, koze èk mwin sé koze èk in kouyon, mé sé o pyé lo mir k’i oi lo masson.

Mézami, mwin té apré rode in kozman pou mwin kontinyé lo dialog rante zot épi mwin é sirtou pou évite répète plizyèr foi la même shoze kan, toudinkou kozman mwin la marke an-o-la la pass dann mon tète. Kozman i sorte dann in gayar shanté in létidyandann tan téi sorte Pari l’avé vni shante pou nou-nou lété dann in n’ote vil. Alor souvan dé foi la korde i kass koté li lé faye é sa lé bien vré. Si dann in n’afèr néna in poin fèb, sé landroi-la la koupe va manké. Sé landroi-la v’ariv linkonvényan…

Mézami lé bien vré dann toute zafèr néna in poin fèb antouléka in poin pa tro solide é sé pou sa, i fo touzour pran prékossion. Konm in gran saz shinoi téi di : « Ranfors oute poin fèb ». Wi pé ossi ranforss out poin for épi konte dsi oute poin fèb pou pa sédé, mé rokoné sa lé riské.

Alé ! Mi kite azot rofléshi la dsi é ni artrouv pli d’van ? Sipétadyé.