Médame zé Méssyé, la sossyété, koze èk mwin sé koze èk in kouyon mé sé o pyé d’lo mir k’i oi lo masson.

Mézami kozman mwin la mark an-o la sa in provèrb bien koni shé noute bande frèr-sère antiyé. La pa bézoin ou néna bak+24 pou koprande kossa sa i vé dire sanss prope, mé sans figuiré sa i vé dir na poin laz pou mor : wi pé mor vyé, wi pé mor zènn, wi pé mor ninporte kèl laz.

Sa i fé panss amwin zistoir mon gran-pèr la rakonte amwin. Li l’avé in bon laze é li téi kontinyé alé lantèrman lé zot, é té pa rar demoun téi fé ali in réflékssyon é sa téi fé pa plézir ali. In pé téi di konmsa in pé étoné : « Méssyé intèl, sa sé ou sa ? Ou lé ankor la don ? » – sa téi vé dire, li noré fé in bon ranplassan d’mor. Ziska k’in zour néna inn la fé ali in roflékssyon é li la réponde sinploman :

« Vi koné mounoir, néna pliss zènn bèf i sava labatoir ké bande vyé. »

Alé ! Mi kite azot rofléshi la dsi é ni artrouv pli d’van. Sipétadyé.

Justin