Matante Zélida la ékrir Justin :

Mon shèr nové, mon spès salté,

Touléka, i fo an avoir in sèrvo séryèzman kontourné, pou artrouv sak bann rouj-de-fon i déside. Sirtou kan nana in zéléksyon prézidansyèl. Mi souvien, in zour, l’ané 1995, zot la si tèlman bien fé zot zanbrokal la politik ké d’moun- bann zournalis an parmi — téi kroi bann rouj téi fé vote Chirac. Mi souvien ankor l’ané 2007, kan Sarkozy, li-mèm, té i kroi bann rouj té i fé vote pou li, é in bonpé d’moun la bate tanbour la-dsi. Zordi, zot i domann vote pou Hollande, mé solman zot i di ossi i pé vote Melanchon. Lé sèryé zot ka ! Tou léka, moin lé sir in pé anparmi zot moun i konpran pa zot globiboulga. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,

La pa ké ou i konpran pa, mé ou i fé konmsi pars ou la bien konpri PCR i fé pa vote pou Sarkozy pars bononm-la la tro fé mal lo pèp. Mi pans ossi, vi k’ou la pa tyé kouyon pou pran son plas, ké ou la bien konpri pou kosa lo Parti i domann vote pou Hollande é i tak pa baro pou Melanchon. Dabor, pars vi koné bien La Rényon, la sityasion lé pa ékzaktoman konm sète la Frans donk ni koné in pé désizyon i pé pa aplik sa tèl kèl la-ba, èk issi. Nou lé pa dann mèm loséan, nou na poin lo mèm nivo dévlopman, pa lo mèm voizin étsétéra, étsétéra la ké lo ra. Donk, PCR la fé son program pou La Rényon. L’èr-la, vi k’dé kandida i kroiz nout shomin pou bonpé séktèr é konm nou na poin nout kandida anou, ala pou kosa nou la pran nout désizyon. Dé gran kandida k’i kroiz nout poinn vizé, mi pans sa lé bon pou nou. Tok ! Pran sa pou.

Justin