Ziska oussa v’alé la kouyonis épi la méshansté d’moun ? Sé konm k’i diré, lé san limit. Zot va di amoin, moin la pa invant zèf boui. M’a réponn azot : la pa bézoin mi invant, akoz nana an gaspiy bann zinvantèr z’afèr konmsa.

A non ! Mi koz pa an parbol ! Mi mazine solman sak la invant in mashine i fé kalité vibrasion, bann jènn i gingn pa siporté, sa i fé si tèlman mal z’ot zorèy. Kan ou la fine trap vinn-sink an, ou i san pi, mé i démont out zorèy san k’ou i konpran.

Invanté, sé in n’afèr - nana plin mashine i ansèrv pa arien déssi la tèr - mé mète an aplikassion, sa lé for. Si tèlman k’in pé dmoun la mète sa dovan tribinal pou domann i intèrdi. Nou va oir kossa tribinal i désid.

Pou mon par, moin na konfians la zénès, akoz moin la pa bliyé kan moin té zène, moin té i shant : « De la jeunesse, vient la promesse d’un avenir meilleur ! ». É bin, m’a dir azot, mi pans ankor konmsa zordi.

Justin