Mi koné in madam, son mari lé mor. Par l’fète, èl lé vèv. Son mari té i toush in pti rotrète, é zot té i aranj konmsa. Mé in zour la mor la vni balèye dovan z’ot porte é la parti avèk lo boug. Kan èl té fine fé son dèy, èl la rode in manyèr gingn son soso, kan mèm pa bokou, in pti morso. Èl la parti la grann kèss pou déklar lo désé... la domann si i toush ar pa son pti moné. L’èr-la la réponn aèl son révèrsyon sar égal la moityé la rotrète son mari : sink san katrovin, ou diviz sa an dé, sa i fé dé-san katrovin-dis. El la fé in domann érémi, pou gingn in konpléman. La té dir pou èl ! La son pla lété kré-kré mèm ! Traka, matin-o-soir. Somèy ziska té i vé pi viv avèk li an armoni.
In moun la di aèl, èl i pé gingn in konplémantèr. El la fé son domann, é in zour lo rézilta l’arivé. El la gingn sisan éro ; son larm la koulé afors soulazman. Mé, son pansyon la romonte in pé dsi, dé-troi moi an èryèr. So kou issi èl na in dète sisan soisan-dis éro. El la fé in domann dégrèvman. La tir soisann sète éro sinkante déssi soloman, épi la di aèl i fo pèy lo sisan éro k’i rèss. Sé la loi, i fo péyé. Sé la loi ? Ou byin sé in loi pou èl ? Pars èl i antann dann radyo gouvèrnman la donn dégrèvman par milyon bann moun nana la fèss-an-or : trann-troi milyon pou inn, vinn-sète milyon pou l’ote*. Dépôi, dé mézir, in loi pou inn, in loi pou l’ote. Inn pou la fèss-an-or, l’ote pou moun pov.

Justin 

* Liliane Bettancourt la gingn in shèk 33 milyon l’éro par lo boukliyé fiskal, bann zérityé lo skiltèr César in dégrèvman 27 milyon l’éro.