Zot i koné néna koméla – sète ané si zot i préfèr – toute in trikmardaz dsi la késtyon d’kann issi La Rényon. Mèm lakor pou lé zané k’i vien la pankor signé é sa kan la koupe i sava biento arivé. Sé dire azot si bande plantèr lé trakassé, sé dir azot si bande zizinyé zot ossi i koné pa koman fèr pou démaye zot kari.

Mwin la fine dir sépa konbien foi sistème Virapoullé avèk la fédékane la mète an plass, sa la pa in bon sistème ditou mé nou va an roparlé, pars pou linstan mèm sistème-la lé an difikilté rodémaré, trouv in nouvo réspirassion. Mé la pa sa mi vé anparl azot zordi. Mi vé anparl azot kozman in plantèr la di : li la di konmsa, si i kontinyé kann lé kondané é si kann lé kondané kossa i fé a la plass. Apré li la razoute èk sa : toute i sava plante patate, maniok, léguime ! Pou vande kissa ? Pou fé kossa ansanb ?

Mézami problème li la di, sa in gran problème. Sa i poze la késtyonn la rokonvèrsion lagrikiltir La Rényon. Mé problèm-la, sa i règ arpa an dé kou d’kuiyèr a po. Sa i domande in létide sèryé é si lé nésséssèr in plan pou la rokonvèrsion avèk in volé larzan inportan pou finans lo plan.

Mé sanm pou mwin kann néna ankor in l’avnir la Rényon. Pa arienk pou dsik mé konm noute zoinal Témoignages la di pou mète an valèr lo kann, épi son bande ko-produi i pé tire ladan. Mi arète la pou zordi, mé lé sir sé in n’afèr i fo okipe sèryèzman é bande nouvo député La rényon néna in téré suiv l’afèr de pré.

A bon ékoutèr, salu !

Justin