Lopromyé kozman mi rapèl sa épi mi koné issi ann la Rényon noute toute i mète sa dann la boush in sèrtin Lauran Vergès lo éro toute kominiss i rokoné dopi li lé mor an plin kèr son zénèss. Pou nou li la di sa an plin dann l’assanblé nassyonal lo zour li la ranplass son papa konm député é lo zour, promyé foi, li la pran la parol dann l’assanblé nassyonal.

Lo dézyèm kozman li ossi lé inportan pars souvan défoi sé sak i rézist lo pli lontan k’i ranporte lo viktoir. Dann déssèrtin konba la boks néna douz raoune troi minite é si wi larg lo kor avan lo dèrnyé raoune wi pèrde la parti, mé si wi tienbo ziska dèrnyé dé dèrnyé, ou néna la shanss ranporte lo konba — in zouar rigbi néna dé tro zour téi di : lo match i dir katrovin minite é si wi tienbo ziska la finission ou néna dé shanss gagné.

Listoir lo Group réfijyé Chagos lé bon pou ilistre lo dë kozman pars dopi lo débi ziska zordi banna la lité pou fé rokonète zot droi umin, fé rokonète si zot i di pa zamé zot lé pli for k’lé zote zot i di galman zot lé pa pli fèb é sé zot droi k’i fo réspékté. Parèye pou tienbo larg pa : bann shagossien avèk la dirékssion Olivier Bancoult la zamé sédé é sé konmsa ké zordi zot lé pa loin fé rokonète par bann péi vyolèr zot droi viv dann péi zot lé éné, épi rotourn laba.

A bon antandèr, salu !

NB Si nou ossi rényoné ni koné transform dê parol-la an akssyon — si lo vèrb i divien akssyon — mi panss nou ossi ni pé avanssé ziska dèrné baraz va tonbé.

Justin