Mé zami, zot i koné Moris sé sak ni apèl nout il sèr.. . Sa i vé pa dir ni antan konm shoushout avèk la mori, pars souvan défoi ni kritik inn a l’ot. Mi rapèl in tan demoun La Rényon téi trète bann morisien manzèr d’zako, é nout bann frèr é sèr morisien té i rann anou la moné nout pyèss an kritikan nout bann défo sipozé. La vérité nout problèm i romont dann tan nout listoir kan inn téi apèl l’il de Frans é l’ot l’il Bourbon é aprésa nout bann dézakor la kontinyé ziska zordi.

Zordi nou lé néokoloni fransé, é Moris lé indépandan. Nou lé pa mète de nou, é nout bann frèr é sèr lé mèt dé zot. Si tan tèlman, kan néna in problèm l’inn é l’ot i pran pa lo mèm solisyon. Sa té vré dann tan shikungounia, sa lé vré pou la ding é biensir zordi sa lé vré pou lo kovid. Moris konm Sésèl la fèrm l’aéropor, épi la mète an plas zot prop moiyin pou bataye kont lo virius. Nou isi, gouvèrnman fransé la fèrm anou, alé oir nou l’avé poin la maladi isi. Kan la maladi téi ménas anou pou vréman, gouvèrnman la fé tout pou la maladi atak anou : li la rouvèr la port a dé batan.

Zordi i pé dir, dsi la késtyonn la maladi, la stratézi Moris la réisi-pou l’instan pars ni koné pa domin - lé péyan. Nou, nou lé anplin dann l’èye lo siklone é pèrsone i pé pa di si nou va ansort anou avèk bonpé la kass, sansa trépé… An touléka, néna inn, moris, la désid par li mèm sak téi fo pou li é nou isi, sé La frans la plak son solisyon dsi nou…zordi ni voudré pilote nou mèm nout bato, mé La frans i vé pa é mèm myé i diré li pran in malin plézir fout anou dann traka, dann in famé tablatir.

Dé poi, dé mézir ! Inn pou Moris pars li lé lib épi mètr dé li ! Inn pou La Rényon pars dési la késtyon ni poz, nou lé ni lib, ni mètr de nou.