Pou dir vré, moin la pankor romark dé poul apré kouv dann mèm ni : inn nana son ni, l’ot nana la syène é kan l’ariv l’èr pou kouvé, shakinn i kouv dann son ni pèrsonèl. Biensir, koméla, lo moun lé modèrn, é bann zèf fékondé i sava dann kouvèz artifisyèl. Talèr in pé pti poulé lé kapab kroir sé sa z’ot momon... Ni sava pa pli loin la dsi é ni sèy sinploman konète kosa sa i vé dir, an vré, dann la sosyété. Mi pans sa i vé dir dé famiy i pé pa ko-abité. Pars zot i konpran lo bann rolasyon lé riskab ète pa konm k’i fo. Si inn fiy nana z’anfan, lé difisl arète dann la kaz momon. Konm la bèl fiy avèk la bèl mèr. Si lé oblijé ébin i pé pa fèr otroman, mé sa la pa in bon n’afèr é lé inn konm lé z’ot nana l’inprésyon zot lé pa shé zot. I pé dir sa osi kan dé sosyété nana lo mèm syèz é inn konm l’ot i fé komèrs lo mèm produi. Kosa zot i anpans zot ? Alé ! ni artrouv pli d’van !