Néna lontan mi antann kozman-la, mé la pa pou sa mi konpran ali l’èr ki lé zordi. Dabor dsi la késtyonn poul , mi rapèl, kan moin lété marmaye moin la vi é pa arienk in kou dé-troi poul ponn dann mèm ni é apré an avoir ponn plizyèr zèf, l’èr kouvé l’arivé, é zot téi bataye pou gingn kouv dann mèm ni.

Donk déza lo kozman néna son sans prop in pé mal défini parl pi pou lo sans figiré…Dé madam i viv pa sou lo mèm toi,Pétète lontan ! An touléka la pi tro vré koméla pars moin la fine oir é ro-oir dé madam viv sou lo mèm toi épi gingn zanfan, shakinn son koté.

Mi di pa ké bann z’ansien lété kontan d’sa, mé konm i di ,si ou lé pa kontan ou i pran konstan.An inn-dé pti mo :ou i fé avèk,ou i ansort aou konm ou i pé : ou i mète out santiman dann out posh épi out moushoir par dsi.

Tousala pou dir azot mèm dann nout lang kréol rényoné néna désèrtin kozman mi yèm épi d’ot mi yèm pa.Alé ! Mi kite azot rofléshi ladsi é ni artrouv pli d’van. Sipétadyé !