Mé zami, mi pans zot i konpran kosa kozman-la i vé dir. Lé parèye si ou i di : dé moino dsi in zépi, i tard pa bataye i pète. Mé la pa tousa : zot la fine bien rogard in shate apré souk in zoizo Zot ? Zot la fine oir ali, kan konm k’i diré, li anvoye son majigador dsi lo zoizo… Ou néna konm linprésyon lo shate l’apré lans son bann zond diréksyon lo zoizo ziska k’i déstabiliz sète-la. Si li la pa shapé bonèr, talèr lé tro tar é kan li sèye sové li gingn pi. Dizon son misk lé an koton, son nèrf lé anploté é lo shate i konpran bien tousala é kan li atak li koné sé lo bon moman. Alor si néna dë shate i rod trap in zoizo, pou komansé lé dé shate i sa bataye é lo zoizo i pé sové. Konm koi si ou néna zènmi, lé proférab zot lé divizé pars lèr-la lé pli fasil bate azot. Alé ! Mi kite azot rofléshi la dsi é ni artrouv pli d’van. Sipétadyé.