Bann zournal Péi komor dann malizé : Dann péi Komor nana in sèl inprimèr sé Graphica, in l’antropriz i travaye galman dsi La Rényon. Sanm pou moin, dopi somenn isi lo l’inprimèr la désid arète fé sort inn-dé zournal pars banna i doi bonpé l’arzan é zot na poin lo moiyin pou péyé. Gouvèrnman l’avé di li nora ède bann zournal mé ziska zordi li la pankor fé arien. Lo zournal Al-Watam i sort an 4 paz plito k’an 8. Alfadjr i sort an pti kantité tan k’a La Gazette èl la pa parète ditou. Sé dir si la prèss papyé i konète la kriz Tout i atann gouv-èrnman i révèy in pé mé sé pa lo ka pou lo moman.

Le CFA, dominasyon la Frans dsi La Répiblik islamik dé komor. Lé komor lé dann la zone CFA. Konm ni koné, sé in moiyin pou la Frans pou domine l’ékonomi dann in péi. Avèk lo fran CFA l’indépandans lo péi lé pa in l’indépandans réèl, sé in l’indépandans pou boush lo zyé... In l’égzanp : si lo péi nana in rantré l’arzan, nana 65 % i sava dsi in kont lé pa dann z’ot péi mé dann La Frans é zot i pé mèm pa konète konbien l’arzan na dsi si tèlman la zéstyon lo kont lé pa transparan. Arzout èk sa i inprime l’arzan Cfa dann La frans (Chamalières, péi Giscard) é sé la bank de Frans k’i désid la kantité l’arzan i mète dann la sirkilasyon. Final de kont, ou lé pa mètr out l’arzan ou lé pa indépandan ditou. (Lé z’ami alé dsi You tube épi rogard épi ékout lo bann vidéo dsi lo pakt néo kolonyal ; Mi asir azot sa i vo lo détour.)

In kanpagn vaksinasyon kont la maladi bann z’animo. Nana in kanpagn vaksinasyon dann nor la Grann-Komor, pars bann z’animo la trap la malady ; In somm 1 milyon d’fran CFA va ansèrv ou pèylo bann vaksin pou ésèy barète l’épidémi sanm pou moin la fyèv aftèz. Moin na konm l’inprésyon la maladi l’apré tourn otour d’ nou é nou lé ménasé. Pou arzout èk sa, isi lé défandi vaksiné pars ni aplik in règloman éropéin.

Pou aranz lo transpor par l’aviyon. Dopi somenn isi bann l’aviyon va gingn pozé-dékolé dann l’aéropor Moroni. Dé konpagni la fine an avopir lo droi tiliz térin l’aviyon la nuite : in konpagni lo Kénya éin konpagni l’Éthiopie. Donk lo transpor par l’aviyon i amélyor mél o pri lmé touzour sho, an atandan ké li bès in pé si pa domin, pétète apré.