Mé lé pa sa. Konm zot i koné in délégassion gouvèrnmantal avèk lo promyé miniss épi sink minis i sorte fé in vizite Mayote épi zot la désside fé in plan i apèl : « Mayotte doboute ! » é plan-la i vé rokonstruir lo péi dann dé zan d’tan… Pou sa zot i vé fé konm la fé la katédral Pari an pli kourte ankor.

An fète i rossanm pa tro, é nou va oir kossa zot i vé fé pou vréman. Si lété La Chine mi diré : « akoz pa ? ». Mé La Chine sé la Chine tanka in sossyété birokratizé, dann in lékonomi kapitalist avèk an pliss konm modèl ékonomik in « lékonomi d’kontoir » dann in sistèm mi apèl néo-kolonyalist mi pé dir azot mon promyé santiman sé lo doute. Fransman mi doute é bann maoré aparaman i doute ankor pliss.

Mézami m’a dir azote kékshoz ? Mi panss issi la Rényon dann noute parti — son litératir épi son rézo d’konpétanss — néna bann bon konéssèr lékonomi d’kontoir é i koné bien sa lé pa la klé d’la réissite pou bann maoré. Finalman ni koné kossa lo sistèm lékonomi d’kontoir épi la lojik birokratik i pé fèr é kossa k’i gingn pa fèr. Nou lé péyé pou konète toussala, donk wala pou kossa mwin néna doutanss.

A bon antandèr salu.

Justin