Oté

De Zétazénéro an zétazénéro, lo tan béni bann prométèr !

Justin / 16 janvier 2019

Mi pans zot i souvien bann zétazénéro dann tan Sarkozy.Zot i rapèl , moin lé sir, kan lo pti prézidan la fé vnir laba dann Paris tout sak i kont dan la politik bann péi l’outremèr .Moin pèrsonèl moin néna ankor dann mon tète in diskour moin l’avé batiz ali kont-kolonyalis a tor bien antandi pars néna d’in koté lo mo, é néna l’ot koté lo fé.

Si téi baz dsi bann mo, ou téi pé maziné lo sinkyèm répiblik téi sava brak in tournan pou tienbo kont lo lintéré bann péi l’outromèr.Mank de po nou la kroir Pèrnoèl in poin sé tou.

Sèl mo la résté sé lo dévlopman andojène :li la rèss kashyète dann bann mo, é dsi lo poinnvizé la réalité la pa vi ali ditou.

Apré Sarkozy la vni Holland.Holland la fé a nou in gran diskour program Sin-lui é dann tout zafèr li té i done anou rézon :dsi l’anploi li, dsi lo donn kréol travaye li, dsi lo tram-train li, dsi la késtyonn kann é patati é patata. .Lo soir diskour-la téi tourn an boukl dann nout tète.Anfin bann prozé nou té i réklam dopi dé zané é dé zané téi sava trouv favèr.

Sof ké, l’avé poin pli marshann parol ké pti bonom-la.Li la trayi son diskour Sin-Lui an vitèss é li la donn son konfyans bann sosyalis épi Didier Robert é final de kont konm i di lo montagn la mète ba in souri avèk lo famé légalité réèl .Pli inégal ké so légalité la lé pa posib avèk an plis in gran trayizon son bann promèss..

Ala k’in bo zour dann in poshète sirpriz nou la tir in prézidan i apèl Macron.avèk li pa d’kikilik, li pèrd pa son tan é li la dévlop son program konm in shèf é nou téi kroi li téi sava shanj lé shoz- nou té i di, dann nout kèr, li pé paf é pli pir ké lé zot, mé mank de po. Pou shanjé li la shanjé é an pli pir : nou l’avé sinploman obliyé li té i sort dann in zèf Holand l’avé kouvé.Alor nou la vi sak nou la vi : pli iltra-libéral ou i anval out kuiyèr, plis pou bann rish milyardèr lé pa posib.. Alor zordi konm bann zilé jone i fé pèr ali in pé, li fé lo gran déba é li angant anou a kroir ali.

Mé lé bien domaz, oplis li koz, oplis konm Pinokyo son né i alonz avèk bann mansonz.In pé i apèl ali Dagobert é kroi amoin lo roi Dagobert la pa lèss in gran souvnir dann listoir La Frans.I paré li lé désidé ékout anou li la, mé pène pèrdi pou nou lo tan béni bann prométèr mi pans malorozman i kontinyé.

Justin