Zot la ptèt rogard in télé mèrkredi ; in déba si prosin kanpan éléktoral. Navé UMP, PS, PCR, statistisyin, komantatèr, animatèr, réportaz èk z’ankèt siouplé !
Mi trouv sakinn la byin zoué son rol. Moin té zamé antann l’UMP kozé, bin èl té réponn tout késtion, pa d’problèm.
PS osi, si Sin-Bénwa, Sin-Dni, Tampon, minm Sin-Pol ou Sin-Lui, li na répons po tout.
Lo komantatèr la pa fayi son répitasyon, provokatèr mon frèr ! Li zoué lo zé konm di l’éksprésyion.
PCR, pa an rès, i rosantr lo déba si lo dévlopman dirab, la povreté, mank lozman, ilétrism, somaz, zèn diplomé san z’amploi, tou sa la.
L’annui sé ke bann résponsab l’émisyon fine kal zot afèr in manyèr ti ginye pi bouzé.
Koué ou i sar débat kan tout i baz si in sondaz troi-kat komine. 1 : « Zot i pans zot mèr an plas i sar roginy sa méri ? » 2 : « Zot mèr la byin zéré ? » 3 : « Zot lé kontan zot mèr ? ».
Tout i tourn si inn pèrsone ; zot i kroi vréman in z’éléksyon i port si in onm ou si inn fanm ? Na poin d’bilan, na poin d’program ?
Na ryink PS po parl politik transpor dan l’èst ou PC po di « zot i voi pa ke nou lé dan in systèm ki mèn a nou droi dan l’mur depi 1946 ! I fo sanz sa du tout au tout ! Nout manièr kozé èk la Frans ! Nout fason diriz a nou isi mèm ant Rényoné ! ».
Mé UMP i di PS « ou i kroi ou tou sèl i fé lo sosial ? ». Dispit té sar pété, l’animatèr i ramèn in l’ankèt po kalmé.
Alon rasanbl a nou, Réyoné, nout tout, di PCR. Bon, PS i di li na kontak èk PCR, donk in zour vyindra nora so rasanbléman, mi èspèr. Alon espéré, koué zot i pans ?

 Justin