Si zot i lir lo liv « Ile de la réunion : pour un nouveau contrat social – 2006 » zot i pé lire paz 31 i anparl « sauver la filière canne » pars i fo pa lèss prodikssyon-la tonbé.

Pou kossa ?

Pars kan i di kann i di in ta zafèr é pa arienk dosik. In zistoir pou romonte in pé lo tan : Mi rapèl dann tan-la noute famiye téi abite Boi d’nèf sin-Dni, é in soir apré in rényon piblik, doktèr Raymond Vergès la vni la kaze é la diskite avèk mon papa dsi in ta d’zafèr, kann an parmi. Dann tan-la téi pèye bande plantèr zot kann sirtou dosik avèk toute bande sou-produi an shikète étalé dann tan.

Donk mon papa i di lo doktère si pou pèye anou noute kann pèye anou noute kann in poin sé tou é lé pa itil fé atande anou konmsa, fé in pri pou kann épi pèye anou ! Pèye anou an shikète dann tan. Lo Doktère la réponde : « Féliks i fo pa koze konmsa, kann sé in mine d’or – in jarlor si zot i vé – pou La Rényon si tèlman néna zafèr dodan. ». Sa la rèss dann mon tète é lontan apré mwin la fé inn-dé roshèrch dsi kann é mwin la rande amwin konte doktèr Vergès té in vré vizyonère é sak li téi di été vré pou vréman.

Astèr in pé va di, rash kann plante manjé pou kréol. Mwin mi di plito alon fé inn é l’ote konm noute parti i rokomande de fé é sa i tonb bien pars nou lé fine ariv moi d’avril, dann dë moi édmi va komanss éguize bande gran kouto pou rouvèr la koupe é i mankré pi ké na pwin in diskission épi in l’akor, pars mwin lé sirésèrtin sar in vré katastrof pou noute péi.

La Rényon noute péi, PCR noute parti.

Justin