Mézami souvan défoi zot néna somèye é zot i domann si i fo lité pou pa fèrm lo zyé, sansa fèrm lo zyé pou d’bon épi pike in somèye.

Somèye-la sa in maladi ni koné dopi lontan : kissoi dsi lo ban la shanm dépité kan toudinkou la tète i mète a kanté épi i plonj dann in profon somèye. Kissoi lontan kan demoune téi dor dann sharète é lo bèf téi amenn azot landroi zot i vé alé doussman, doussman… Bèf i koné shomin.

Mé koméla doktèr i done bann bon konsèye kan zot i di in sinp somèye la klé i sifi pou rékipèr son konte-somèye. Pou sa i sifi wi sèr oute klé dan la min é wi révèye kan la min i délash é la klé i tonm atèr é sa i fé lèv aou. Mi panss in pti lantrènman sa i doi sifir pou mète an pratik lo somèye la klé.

Romarke anou bien si in sinp somèye la klé i sifi é ké sa i rodone anou lénèrji nou la bézoin pou rolanss la mashine akoz pa ? Mi kite azot roflèshir la dsi é ni rotrouv pli dvan spétadyé.