Mi pans, zot la vi, konm moin, dann télé zistoir lo suiside Mohamed Bouazzi, la-ba dan la Tinizi. I prétan dir sa in moun bien instruiyé, avèk diplom, pli k’i an-fo. Konm li l’avé poin travay, li la rouv in pti komèrs pou fé viv son famiy ; La polis la sézi lo marshandiz. L’èr-la, li la vèrs lésans déssi li, épi li la mète de feu. Li lé mor, mé son mor la donn dépar la révolisyon.

Mi mazine galman zot la vi, so kou issi, dann l’Alzéri, dann in maniféstasyon shomèr, in ga la aroz ali kou d’lésans épi li la sèy mète défé déssi li. Rozman pou li, la polis avèk in zournalis la anpèsh ali. L’èr-la, le boug, banna apré ésuiye ali, konm i gingn té arète pa dir, dann la lang son péi : « Li vé travay ! Li la pa bézoin la sharité, li vé solman travay ! ». Douz févriyé, demoun l’Alzéri i sava vanjé !

Biensir, in pé va di sa la Tinizi, sa l’Alzéri, sa la pa issi. Mé issi nana plis trann-sis mil pèrsone i rode travay é i trouv pa. Issi nana kèk milyé zène diplomé i rode travay é i gingn pa. An parmi bann jenn, na plis sinkant pour san lé marké Pol anploi. Alors, pardon éskiz, sak i éspas la-ba, kissa i pé dir k’i éspas ar pa issi ? Défoi mèm problèm i amèn mèm konsékans.

Justin