Mi souvien in n’afèr nana bien lontan dann in péi i apèl La Russie. Dann tan, péi-la l’avé in prézidan téi apèl Kroutchev. Ni sava pa parl dé li, zis in kozman li la di. Konm, L’Amérik avèk La Russie té apré fé konkour pou oir kisa i avans pli vite ké l’ot dann la konkète léspas é konm La Russie té in pti myète an avans dsi l’Amérik... Donk bann zournalis i koz èk Kroutchev dsi lo konkour son péi èk L’amérik é konm l’Amérik i bate in bonpé tanbour san fé kékshoz pou vréman, lo boug la réponn : "Dann La Russie, poul i ponn apré i shant, dann l’Amérik poul i shant mé i ponn pa !".

Pou kosa mi rakont sa ? Pou sak i koné pa sa, konète ali, mé galman pars moin la vi La Réjyon l’apér poz gran-gran z’afish partou pou li fé la piblisité dsi son "trans Eco Express". Mé i parl pi dé mil bis, i di konmsa total-kapital nora, kan lo plan sar fini fé, dé mil kar dsi La Rényon. Toulmoun i koné sar pa vré. Konm toulmoun i koné la poin moiyin mète sa an site prop pou évit l’anboutéyaz... Nora sirman dé mil pano la piblisité, pétète plis mé lo dé mil kar i fo pa i kont déssi. Konm di bann moun lontan : sak i kroi sa va rogard dann in trou !

Pou mon par, mi pans kan i lans in projé konmsa, lé nésésèr mète an konkirans plizyèr projé pou oir kél sé lo bann avantaz inn par rapor a l’ot, lo bann z’inkonvényan inn par rapor a l’ot, konmsa lo moun i shoizi an konésans de koz. Mèm ni pé dir, akoz i fé pa in référandome ? Konmsa demoun nora lokazyon di zot shoi, épi nora omoins in déba. La pa sa la démokrasi ? An touléka, moin lé pou in sistèm konmsa... Tan k’a fé la piblisité pou in n’afèr pétète i fèr ar pa, mi ranvoy lo léktèr pou bien lir patoi gramoun Kroutchev. Sé sa la sajès !

 Justin