In lang ofissyèl sa i vé dir toute bann zakt ofissyèl i fé dann lang-la-é sa lé marké dann la konstitission lo péi, lo pli inportan an parmi bann zakt ofissyèl. Arzoute ankor toute l’ansègnman épi la formassion épi bann pti diplôme konm bann gran diplome i pass dann la lang dé sign… Dopi ké la lang bann sour sé in lang ofissyèl i pass pa d’zoinal parlé san k’sa lé adapté dann la lang dé sign mé sa i sava pli loin k’sa — par égzanpe bann moune i koz pa, i pé bien avannss dann la sossyété.

In madam néna in bitassion i rakonte dopi èl néna linstrikssyon épi la formassion dann la lang bann sign, èl i gingn okipe son bitassion, planté, rékolté, vann son marshandiz, okipe son kontabilité épi son bann finanss… Kan ni antann sa ni rogrète plizanpliss noute lang kréol rényoné sé pa in lang ofissyèl pou nou — in moiyin sèryé pou mète anou anlèr dann noute péi — in moiyin pou toute kréol rante dann lo dévlopman La Rényon.

Mézami, mi rapèl lo tèstaman in gran morissien i apèl Dev Virawsamy é an parmi lé shoz li rogrète, li anplègn lo kréol morissien la pa in vré lang ofissyèl, in lang formassion épi in lang ansègnman. Zot i konpran ké nou ossi ni pé rogrète la sityassion noute lang kréol La Rényon… Koz sèryé : i sava pa lékol arienk pou aprann la lang bann sign mé galman pou aprann dann la lang bann sign, pou ète formé dann lang-la.

Alé ! Mi kite azot rofléshi la dsi épi pou oir ziska kèl poin la sityassion infèryèr d’in lang i pé andikape in popilkassion. A bon antandèr, salu !

Justin

NB Dann l’Ouganda la lang dé sign sé lo lougandé an sign alé oir noré pi ète langlé bann sign. Konm issi mi sipoz sé la lang franssé bann sign. In dèrnyé romark : néna 160000 pèrssone lé lokitèr la lang bann sign ougandé.