Mé oila, zistoman, k’in linstitu la éstatistik l’INSEE, i sorte fé in kalkil la rogoumantassion bande déssé, konm i fé in pé dann toute bande réjyon La Frans é sé la ké nou la gingn in surprize pétète nou té i atande pa é kossa léstatisitik-la i di :

Dabor néna in koloraz é an parmi bande péi l’outre-mèr sé La Rényon lé pli fonssé konm koulèr, lé kazman koulèr Bordo. Sa i amontr dann in mèm pèryode 2022 par raporte 2019, lo nonb demoune déssédé la goumante 40 %. Pliss ké partou dann La Franss !

Ni koné pa toute demoune lé mor avèk kovid pars i koné pa oziss konbien mor avèk kovid néna. Antouléka sé sak i di dann zoinal épi dann radio : i koné lo nonb mor dann lopital avèk maladi-la, mé i koné pa konbien d’moune lé mor avèk salté-la dann bande mézon d’rotrète épi zot kaz tou sinploman. Don lé shif pou La Rényon lé pa égzak ditou é aparaman an o-lyé i kontante de sa.

Pou tire kèl konklizyon ? Mi koné pa dsu lo poinn-vizé la politik santé. Mézami an tan ké rényoné sa sé in n’afèr k’i malkontante amwin. Pou koué ? Pars lé pa possib konète si noré pu diminyé lo nonb mor. Si issi la Rényon nou lé pli sansib maladi-la an konparézon avèk lé zot péi l’outre-mer. Si sé la prèv par vakssinassion, i tonbe mal pars zistoman nou lé pli vakssiné ké lé z’ote.

Alor ni panss inn de sé zour soré bon k’ in kador dann la médssine épidémyolozik épi la statistik va ésplike anou sa… Astèr mi poze in késtyon : si nou issi nou téi gingn dir noute mo dsi sète afèr-la é si bande moune anlèr téi tienbo konte éské nou noré mové rézilta konmsa ? Ni konétra zamé, pars sé lé z’ot ki désside toute pou nou é nou néna arienk in possibilité, kontante anou mèm si sa lé rajan pou nou rényoné.

Justin