Déga l’éshomann klima ? Alon pa atann ké lé tro tar !

27 décembre 2010, par Justin

Na poin lontan, dann in sobatkoz, in moun té apré anparl, konm in martin filé koupé, la protéksyon la natir. Li té apré résite son leson bien apri déssi bann gaz-l’éshofman, déssi l’otonomi dann lénèrji, déssi lénèrji prop épi sak lé malprop. Bou di kont, li té apré di tout z’afèr ni koné ; tout z’afèr ni antann dann télé, dann radyo, dann radyo trotoir ziska. Toudinkou, in moun, sanm pou moin, té apré byin ékouté la di solman son dé mo : ’Bann érémis i s’anfoutsa !’

Mazine in gran kayastrof !
Kan ou la bite déssi in rosh konmsa, ou i domann kosa i fo réponn. Talèr lo moun na érémi é li pé di aou li koné myé ké pou sak in rmi i pans. Somanké lo boug lé pa rmi ditou, mé na in n’ot lé pou vréman. Alors, ou i rant in pé dann out kokiy é ou i kalkil in pé dann fonn out kèr. Épi ou i di, mazine in kou la otèr la mèr i mont dé, troii, sink mète, sansa plis ! Mazine in pé ra-d’maré i vyin plizanpli for, siklone galman. Kakil in tsounami dis foi pli for ké sak l’ariv la Rényon lo zour demoun l’asasine lo boksèr Catherine. Pans sa solman ! Pans ankor in gro mové tan pli for ankor ké siklone karant-uit, é sa i ariv san prévnir pèrsone konm siklone Jenny !

I vo myé prévnir ké guérir !
Zot i pans la mèr, lo van la ravine dolo, va triy la tète ? Zot i kroi li va shoizi sak i fo kassé, sak i fo léssé ? Pou zot, zour-la sar tan pou komans kalkil sak i fo fé pou l’avnir. Sansa, konm di lo konte, i vo myé prévnir ké guérir. In vérité konmsa, n’inport ékèl moun i fé travay in pé son tète. I pé partazé. Toulmoun i pé konprann in n’afèr konmsa ! La pa bézoin ète rish sansa intélizan, an avoir bak plis vin-kat, sansa in sinp bak dolo, pou konprann sa.

Lé déza tar, pou prévoir ! Alon pa atann ké lé tro tar.

Justin