Mi sort lir, dann l’oséan pasifik sèt dirijan bann z’il Niue, Cook, Samoa, Tokelau, Tonga, Tuvalu, Polynésie fransez i sort réini pou sèy sov z’ot téritoir kont la rogoumantasyon lo nivo d’la mèr. Kosa i ménas azot ? Sé la monté nivo d’lo la mèr an rézon lo réshofmann klima. An pliské sa, konm bann z’il lé plito plate, zot i konpran pou koué banna lé ménasé. In légzanp : Tuvalu. Dann ti roiyom-la na uit z’il (tuvalu i vé dir uit) na dmoun dédan. Lo poin lo pli o na arienk sinq mète par dsi lo nivo la mèr. Dopi l’ané 2001, lo roi la fine anonsé si lo nivo la mèr i mont sar blizé kite lo péi. Arvoir Pyèr, tak baro !

Bann dirijan la réini pou dir zot i vé pa la rogoumantasyon dé dégré la tanpératir. Pou zot, i fo in maksimom 1,5 dogré sansa in bon bout z’ot téritoir sinon lo total kapital sar sou le mèr. Par raport bann gaz avèk l’éfé d’sèr ! Zot i di, zot pèrsonèl épi z’ot pèp, zot lé pou arien la-dan é sé bann péi rish la gate la sos é pa zot. Mi pans zot v’alé la-ba Paris pou la konférans dsi lo réshofmann klima é zot va fé antann z’ot voi

Bravo bann polynézi ! Bin nou dann tousala, ni bouj pa ! Nou lé mèm pa solidèr bannz’il l’oséan indien épi lé z’ot. Poitan kisa la donn l’alèrt na vin zané ? Kisa la prézid l’onerc dopi douzan ? Kisa la pa rète mète an gard ? Sé Paul Vergès ! I ékout pa li ! I donn mèm pa li lo tan dann télé pou li ésplik lo problèm. Bon pou sa mèm ! Mé kisa i sa port nout drapo dann Paris ? Pèrsone ? A bon ? Ni lès fèr ? Ni trakas pa ?
Ni obli pa lé pliské tan.kant mèm : fransh vérité, Domin sé dopi zordi k’i prépar !

NB Si bann gran pointir i bouz pa, ni pé bouzé nou bann ti kolon !