An so moman, in pé tout moun i anvoy son kouplé si sak li vé fé si l’ané prosèn li lé éli mèr sa komine.
Moin la pa vi l’émisyon personèlman...
In sèrtin Hamilcaro, zot i rapèl l’ansyin mèr Sin-Lui, lindi swar li noré di, si li ar-rantr mèr an 2014, èk li, la kantine sra gratuit, i pèyar pi aryin. A bon ? bé koman li sar fé ?
Li kont si sibvansyon l’Éta ? Lontan lavé lo FASO, té i tir si z’alokasyon bann famiy. Mi koné in pé té rotyin si la bours marmay, otromandi, ti tir dan la pos droit ti mèt dan la pos gos.
Zordi, si tèlman tout bann péi éropéin lé dan lo rouz, zot i antann sa tou lé zour, ou byin zot i lir. La komans èk z’Étazuni en 2007— criz dé subprimes —, bann bank la fé fayit ; zot l’avé antasé l’arzan an virtyèl, sété si bann lozman. Toudinkou, partikilyé na pi l’arzan po li pay son pré pars mèm la bank i kont si son règloman po arpay a li. Bann bank éropéin té i api si lo bann bank amérikèn ; donk, di zour o landmin, tout i tonm konm in zé d’kart dobout.
Grès, Portugal, Itali… zot i kroi la Frans lé loin ? Son to d’kroisans lé pa sa ; li ésèy ténir, in kou i di an 2013 va giny remonté, apré i arpous pli loin 2014… va ariv 2017, manda Hollande va finir, la sityasyon sra parèy !
Là, Hamilcaro i kont la d’su li là ? Sa lé konm in provèrb moin la apri l’ékol : « Kont pa tro si la po l’ours la pokor tié ».
Domin, i raz gratuit… alé pa tro si Sin-Lui si out barb lé gran, li riskab ariv a tèr.
Domin, i raz gratuit (mi giny pa mèt an mizik, po zot antann si kèl ton mi di sa, domaz !!!)
Domin, i raz gratuit !!!

 Justin