Si moin lété désèrtin, mi kroi pa moin nora dor trankil. Biensir, mi vé parl tout sak la fé pèrd la list l’Alyans dann z’éléksyon réjyonal. Sak la donn tout zot fors pou ariv in rézilta konmsa épi tout sak lété konplis, kisoi zot plin gré, kisoi konm i di a l’insi zot plin gré. Michel Vergoz épi bann dirizan sosyalis i mérit, fransh vérité, in promyé pri. Mé soman, nana galman sak la fé l’antouraz pintad, promyé konm dézyèm tour. Nana osi tout sak la drap azot dan zot dignité é la pa mèl zot voi avèk sèt bann gogo té i kroi l’avnir nout l’ékonomi épi nout sosyété té plis asiré avèk l’Alyans.

Zordi, kant mèm, sré itil zot i réfléshi in pé. Si zot lé kont lo dévlopman La Rényon, bon pou sa mèm ! Mi pans zot nana tout bann rézon k’i fo pou èt kontan. Tout sak la kasé mèm pa an dé z’ané, é tout sak i rès ankor pou kasé é i tard pa pou fé, mi pans zot boush i doi ri tousèl. Astèr, sak lé pou lo dévlopman nout péi, zot la kant mèm mèt anlèr lo démolisèr Didier Robert, plis d’ot ankor, sanm pou moin zot i doi pa tro èt kontan, pa tro fyèr pou sak zot la donn la min pou fé... konm moin la di, a l’insi zot plin gré... Apré sa, si nana san-sinkant-mil shomèr, plin po sansa domi-po, kosa va fé ? Si bann Rényoné, par paké, la pèrd l’éspoir… parèy ! Si lo péi lé plizanplis divizé an dé katégori, pétèt plis : dopi sak lo sistèm la gonf zot pla, an pasan par sak i tir lo dyab par la ké, ziska sak lé dan la mizèr noir… sé lo déstin ! Zot i pé fé konm Pilate, lav zot min épi déklar zot lé inonsan par rapor lo krime la komi.

Mé a bien kalkilé, o fon, nana désèrtin i pèrd pa arien la-dan ! Pétèt pou sa k’i inkyèt pa zot tro ? Pars lé posib zot lé, dann fon zot kèr, pou in sistèm inzis, é zot karapas lé asé solid pou siport doulèr lé zot ? Boudikont, tout la démolisyon ni oi ziska zordi, sanm pou moin, sa la pa fé bès l’indèks. Alor, pou kosa anpèrd somèy ?

 Justin