Oté

« Demoun i yèm okipé »

In kozman pou la rout

Justin / 13 out 2018

JPEG - 43.6 ko

Sa in kozman i antann souvan koméla. Moin lé a d’mandé si demoun lé konmsa arienk koméla, sansa si sa lé vré an tou tan. Mi rapèl in zour, dann kartyé moin lé éné, do fé la pran dann in kaz an paye. Mi koné pa ousa d’moun té i sort, mé dann in tan rokor tout demoun l’androi té la sof sak l’avé poin la pate pou marshé. La pa anpèsh lo kaz brilé. La pa non pli ède lo famiy pou trouv in solisyon pou son bann problem mé rogardèr l’avé é an pliské sa, rogardèr initil-mi anshèv dir. Néna in provèrb shinoi i di konmsa : lo saj i okip pa lé shoz k’i rogard pa li. Sa i vé pa dir li lé pa solidèr, mé solidèr pou la po d’patate la pa son tass kafé. Alé ! Mi kite azot rofléshi la dsi é ni artrouv pli d’van. Sipétadyé.