Na poin tro lontan l’évèk La Rényon la konsèy bann fidèl shoizi byin zot rolizyon : plito k’ kontinyé amènn dé-troi an mèm tan, li angant lo moun pou shoizi inn tousèl pou tou l’bon. Sa sé son manyèr oir lé shoz. Sa sé galman son résponsabiité d’shèf légliz katolik.
Moin pèrsonèl, moin la poin aryin pou di la-dan : an vérité, pèrsone i di pa moin mète mon grinn sèl dan sèt afèr-la. Sa i vé pa dir moin la poin mon lopinyon ; sa i vé dir zis ké mon lopinyon i kont pou la po patat.

Na dé troi zour, moin la antann in zistoir vré. Si tèlman sa lé zoli, mi vé rakont azot. Alors, siouplé, tir grinn mayi dann zot zorèy !

Donkalor, na inn fiy aproshan vintan. Èl lé fiyansé avèk in garson, in jènn konm èl. D’apré moin, zot na in projé d’maryé, pa tout suit a s’ki prétan, mé inn sé zour. Fiy-la la batiz tamoul solman, é son ga la batiz katolik. Dépi in koup de tan, èl la parti légliz pou fé in parkour ; sa lé oblizé. Épi, samdi soir, èl gingn son batèm, dann so rolizyon-la : son famiy té la, son fitir bèl famiy ossi, son fiyansé té la galman. Lé shoz la byin spassé. Tou l’moun té kontan !
Mi pans èl la fé son shoi, la konsyans lib, é son tousèl. Mi pans galman èl la fé sa pou lamour son zézèr. Solman sak moin lé sir : èl la désid sak èl la désidé pars dan nout péi nana in gran kantité d’moun na o moins lé dé rolizyon, tamoul èk krétyin, épi lé pratikan dann inn konm dan l’ot. Demoun nout péi lé konmsa mèm !

Justin