Mésyé, Médam, La Sosyété koz èk moin sé koz èk in kouyon mé sé o pyé d’lo mir k’i oi lo bon mason. Mé zami, moin lé sir zot i koné kozman-la, in kékshoz pou fé rir… konm pa ! I fé rir pou kosa ? Pars isi shé nou demoun lé konmsa. Ni ri nou mèm de nou pars nou lé konmsa : nou sé in pèp kasèr lé kui, é nou la touzour été konmsa. Mé atansyon pangar la pa pou sa ni yèm i pran anou pou dé yonkou. Pars souvan défoi lé konmsa : bann gouvèrnman i tourn anou an bourik, bann gro vaza i tourn bann ti kolon an bourik par dovan nou… San konté lo bann foutan i larg dann nout do konmsi ni koné pa, konmsi ni antan pa, konmsi ni oi pa, konmsi ni antrovoi pa lo zé zot i fé avèk nou. Mé mi pans i fo in zour zot vilin manyèr i kass par boute. I fo in zour zot i apèrsoi zot ane sé inn bourik. Alé ! Mi kite azot rofléshi la dsi é ni artrouv pli d’van. Sipétadyé.