Mézami zot i koné demoune La Rényon, sa lé kassèr lé kui parlpa ! Pétète koméla la pass in pé, mé dann tan la plipar d’moune l’avé zot ti nom gaté é demoun té i koné azot dsou lo nom-la. Kan mwin lété lékol toute bande mètr l’avé zot sirnom, dan la kour rékréassyon, marmaye parèye. Mèm dé foi bande zanfan téi érite lo sirnom zot bande paran é sa téi sava konmsa dsi plizyèr zénérassion.

La politik té pa égzan, mé sirtou dann in tan la préféktir avèk gouvèrnman téi fé lélékssyon inn ou l’ote-an volan-é lo pèp téi vanze ali an donan lo nom lo bande zélu pré pou l’anploi. Mi sava pa dir azot toute, mé dann sid laba l’avé in mèr téi fé son zélékssyon an aranjan lo ch’min. Sitèlman téi apèl ali boute ch’min. Li lé pi la zordi donk mi sava pa di ni son nom, ni son pti nom.

Mé par l’fète mi koné inn la bien ranplass ali par son route an mèr. Son route sansa pétète son boute la route pars opliss i sava, opliss mwin néna konm linpréssion nou lé pa paré pou gingn in route antyé mèm si sa i sa koute la po dé f… Alor pou kossa pa done sa son nom, sansa akoze pa done ali lo nom. Koman ni diré sa ? Mi diré sinploman Didier boute shomin é mi panss sa in nom i mérite ali.