Mézami la pa zordi, ni yèr, sar pa domin lo promyé ka, dë moune i fé in l’akro dann linz maryaz si tèlman ké bann gran maryaz souvan dé foi i déboush dsi in divorss, sansa dsi in séparassion. In pé i di, demoune la bril la paye é souvan défoi sé dé shoz k’i ariv.

Mi dira pa zot sa i ariv solman o vivan é poitan lé vré — in mor sé touzour in bon moune. Mé antanssion, la manyèr k’mi koz, mwin lé siréssèrtin in pé va panss mwin na poin konfyanss dann la natir imène, mwin na poin konfyanss dan l’om épi dan la fam.

Mé mi panss la pa vré sa : mwin néna konfyanss é mwin lé pa toussèl sof ké konm Daniel Vabois i di dann zistoir Tizonm : « Toultan kari d’kanar, toultan kari d’kanar, ou lé bien èz néna dé foi d’manj in ptite pintade »…é sa san k’in gran kou d’lamour i parnn inn ou l’olte dann in kouple.

Alé ! Mi di sa rantre nou é ni artrouv pli d’van, sipétadyé.

Justin