Mé zordi lo kok lé mor é lo problème lé antéré.

Astèr souvan défoi demoune i s’plègn pars d’ote i fé la mizik é sa i anpèsh azot viv normalman si tèlman zot i domande zandarm alé konstate lo flagran déli d’tapaz noktirne, sansa tapaz diirne. Si tèlman sa i okipe lo tan bann zandarm sansa bann poliss souvan défoi néna myé k’sa pou fèr.. Mi pans bann voizinaz i fini par trouv in l’antante rante voizin - Problème voizin i règ rante voizin !

Ok ziské la ! Mé kan néna in problème rolizyon i rante an zé sé la k’lafèr i konplike. Mwin la déza antande demoune apré s’plinde pars la klosh légliz i sone é fini la grass matiné pou zot. Sa lé vré la Rényon, mé sa lé vré laba dann La franss pou la klosh mé galman pou la pandil. Mi koné pa si la fine ariv a fé prossé pou sa, mé pé s’fèr la fine fé prossé mé mwin pèrsonèl, mi koné pa.

Yèr mwin la antande demoune apré plégné pars zot i arèst pa tro loin la shapèl tamoul é zot i éstime lo sèrviss rolizyé i fé tro dézord pou zot. La pankor fé prossé, mé lé possib d’issi d’laba néna inn-dé grogn épi inn dé malkontantman.

Sak lé sir sé ké demoune i siporte pi tro lo brui é opliss i sava, opliss nora pliss do brui, é demoune sar pa kontan, ziska pétète in zour trouv in solission i kontante lé z’inn é lé z’ote, mé so tan-la la pankor arivé é mwin la pèr ké sé in n’afèr ké va prande son tan pou trouv in komansman d’solission — Provèrb-kozman : la vitèss néna son tan.

Sèl romède la passyans é la passyans i guéri la gal. A bon antrandèr, salu !

Justin