Zédi nou la aprann in linstiti sondaz i apèl IPSOS la fé in lankète d’opinion. Dann télé épi dann zoinal nou la gingn inn-dé zinformassion san prann konéssans la globalité lo dossyé pars pou bien konprann in n’afèr konmsa i fo ni kass noute koko é la pa toulézour nou lé an éta d’kass nout koko.

Sak ni rotien é sak demoune i di dann radio sé ké l’moune issi dann noute péi La Rényon i viv dann in bonpé traka ; shakinn néna sa par dann in mond i anmank pa traka an kantié..A ! biensir si lo traka lé zinn é lé zot néna lé bien réèl i pé touzour trouv in boukémissèr.

Issi la mode i vé la klass politik i porte lo shapo san ké ni domann anou touzour kossa i lé klass-la, kissa néna dann klass-la, si èl néna lo pouvoir pou fèr avanss la koz La Rényon é si lo politik néna lo bann zoutiye k’i fo pou règ nout problèm si sé zot k »i doi fèr sa..Mwin pèrsonèl mi mète la plipar d’tan lotèr dsi lo sistèm néo-kolonyal ni sibi dopi bélaz é bo tan.

Alor si l’moune lé trakassé, dann in mond trakassan pou mwin sé ké nou lé anklavé dann in sistèm inadapté é k’i pèrmète pa nou trouv in solission global pou noute péi épi noute bann demoune.

A bon antandèr salu !

Justin