Pars légzanpe bann zansien i done, sa lé zamé pèrdi. Mézami zot i koné noute pèp la touzour lité pou arash bann zavantaz l’avé pou arashé : listoir i amontr anou si na poin la lite, napoin d’viktoir, na poin d’progré sossyal, é si na poin d’progré sossyal lé pli fassil rokilé k’avanssé… Noute toute ké lé la, nou néna dann noute tète lo souvnir toute sak la disparète avan nou épi souvan défoi la konsakre zot vi pou fé progrèss bann travayèr, mé pa solman pou fé avanss ossi lo pèp noute péi. Si mi révèye in pé lo souvnir mwin la garde bande zansien, mi diré banna téi i koné la lite lé global : èl lé ékonomik, sossyal, el lé kiltirèl é zordi el i rozoin avèk la défanss l’anvironeman. la défanns l’anvironeman ki kondissyone li mèm la vi l’imanité é néna lontan ké ni koné sa, é ké noute kamarade Denis i koné sa.

Dopi dé dizène é dizène zané Denis lé dann toute bande konba bande travayèr. La falu bataye pou fé aksèp lidé ké La CGTR té in sindika roprézantatif bann travayèr rényoné kan la kré la CGTR lané 1968 dann in sal laba La Plaine dé Palmistes. Nout kamarad i yème dir « lo sossyal sé lo motèr d’lékonomi » mé lo pouvoir dizon lo sistème i sèye dopi dé zané détruir lo sossyal é ni sorte oir sa ankor dann la réform bande rotrète soidizan prévi pou ékilib lo sitème rotrète mé an fé i ékilib pa ditou é dan l’ané ki vien sar sirman oblizé diminyé bande rotrète é lékilib nora pa dir lontan.

Denis i koné ossi lo roll lo shan néna dan la lite é konbien d’foi, nou la vi ali soulèv son poin pou antone l’internassyonal pétète lo sèl issi La Rényon a konète par kèr dann toute son bann kouplé. Noute gayar shanté révolissyonè. Konbienn foi nou la antann ali shante so linternassyonal… Mé la pa sa solman é mi rapèl dann Por li téi shante ossi séga-maloya é mi rapèl sinploman lo boute in kouplé téi di konmsa « Ti di ké toué lé kosto, m’a dir toué dé troi pti mo… » Mi arète la mé sé sinploman pou dir azot koman Denis lé fondamantalman in rényoné portèr d’noute kiltir rényonèz é mèm gardien d’inn sèrtène fasson d’noute patrimoine kiltirèl.

Denis Irouva ké l’internassyonal i kontinyé rézoné dann toute son bande kouplé. Ké lo sossyal i kontinyé d’ète in poto-mitan pou lékonomi, ké lo patrimoine kiltirèl rényoné i kontinyé dévlopé pou lo gran bien noute l’idantité rényonèz.

A bon antandèr salu.

Justin