Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Dépi moi mars la byin shanjé !

lindi 13 séptanm 2010, sanm Justin

Somenn dèrnyèr, moin la vi dann zournal la droite in gran piblisité Réjyon Rényon. Èl la fé konète son plan, èl, pou rolans lékonomi. Na in bonpé konpartiman dann so propagann-la. Défoi na poin shif... Kan na poin, i pé dir la pankor kalkil konbyin i fé, mé pétète na l’intansyon fé. Dé foi nana. L’èr-la lé pli séryé, kisoi ou la mark sa dann in bidzé épi ou la pankor dépans lo larzan, sansa ou la mark dann in bidzé épi ou la fine komans dépansé. La i di, ou la fine angaj lo dépans.

La Rényon lé apré travay ?
In légzanp ? Réjyon Rényon i déklar, dépi moi d’mars li la fine angaz troisan vin milyon pou sinkant-uit shantyé. Donk sanm pou moin, pou son par li la fé son tousèl, sansa ankor li l’apré fé, sansa li ède fé, sinkant-uit shantyé... Sa i fé in bonpé larzan, pa assé pou bann lantropriz batiman, mé kantmèm in bon some. Si ou i arzoute èk sa sak bann koléktivité l’apré fé, ou i diré La Rényon lé anlèr. La Rényon lé apré travay.

Larzan déssi papyé !
Poitan, lé pa vré. Poitan nana dis mil shomèr anplis dann batiman. Alors, kossa sa i vé dir ? Lo préfet i donn in pti bout la vérité. Li di, toute bann koléktivité, La Réjyon li, Départman li, koléktivité d’komine li, komine li la fine program pou dé san sinkante milyon l’éro solman. I vé mèm pa dir lo shantyé la fine rouvèr. Ousa lo troi san vin milyon Réjyon Rényon la passé ? Fransh vérité ziska zordi, avan lo roi Didier té i ariv, Réjyon Rényon l’avé in répitasyonn ète séryé. Avan li, mé dopi li l’arivé, la byin shanjé.

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus