Radmaré : tousa déga noré zamé arivé si lavé réspèk lo droi la natir ! Nout bann zansèt té i koné bien té i falé pa fé la kaz tèr-la ! Ala kosa i ariv kan i réspèk pa lo sinkant pa !
Lo moun i di sa, an plis fé gonf son nèrf de kou, sa i rasir ali, vik solon li, li baz sï sak li apèl lo droi la natir épi sï la sajès (!) nout bann zansèt.

Noré tro pou di la-dsï, solman i pë pa dir lé pa in pé vré : nana in takon dmoun la mèt azot sï bordmèr san droi, sof zot toupé, sof piston in politik bien plasé. I fé la kaz ninport ou épi kan dézagréman i ariv, i mèt an kolèr, solman sa i anpèsh pa arkomans fé la bétiz dan lé o, dan lé ba, tout koté.

Lé ga ! La natir la pa marmay lékol. La mèr, lo van, gro plui i fé pa santiman avèk nou. Zot i koné pa l’moun zot. Alor i fo ou èm ali mé i fo ou krin ali. Oplis li sar zoli, trankil, zantiy ; oplis li sar in éspéktak pou ou ; oplis son gaz, talèr lé riskab lévé. Alor, tansion pangar !
Sirtou si ou sava ravaz ali konm demoun lapré fé, avèk la polision dépi tan é tan n’tan.

Justin