Mézami sé tan issi i anparl bonpé la rotrète. Mèm in pé la pèr i obliz azot kontinyé travaye mèm kan zot nora pi lo l’énèrzi pou sa. Dann minifèstssion néna in pé té i di 64 zané non, soissante dë lé déza tro. Pars boudikonte lo problème lé la : kontinyé travaye oui, mé ziskakan é kissa i pé désside in n’afèr konmsa.

Dann lo ralé-poussé dsu la rotrète mwin la antande in moune dir : « Mwin mi arète travaye, mi sava dépoz mon zoutiye rant lo pyé la vyèrz noir ». Mwin té ziska kontan antande sa pars mi panssé demoune lété fine obliye kozman-la.

Mézami, mi arète tèrla mon kozman pars ankor in foi mi antrovoi dann in ral-poussé rante rish épi pov é mi oi pa gouvèrnman trouv in solission konmsa sof a tir dsu bande pov pou mète dsu bande rish é sa — konm i di ! — sa lé vyé konm Hérode.. Mi kite azot rofléshi la ds é ni rotrouv pli d’van. Sipétadyé.

Justin